Бууз

Бууз гэдэг нь усаар зуурч, элдэж хавтгайлсан гуриланд татсан мах хийж боон, ууранд жигнэж болгодог монгол хоол. Цагаан сарын үеэр монгол айл болгоны баярын ширээнд залардаг хүндтэй хоол юм.

Уг гарал

Буузтай төстэй, голчлон махыг зуурч элдсэн гуриланд боож хийдэг хоол нь Евразид орших үндэстэн ястнуудын дунд өргөн тархсан. Жишээ нь, хятадын баозы (bāozi), жаозы буюу гёоза (японоор), Балбын Момо, оросын пельмени гэх мэт.

Буузтай төстэй бусад хоолнууд:

• Банш
• Хуушуур

Хийх арга

 Орц

• Гурил
• Хонь буюу үхрийн татсан мах
• Сонгино
• Ус
• Давс
• Бууз амтлагч

 Хэрэглэх зүйл

• Жигнүүр
• Элдүүр
• Гамбанз

Хийх дараалал

1. Гурилаа устай хольж зуурна.
2. Зуурсан гурилаа жижиг хэсгүүдэд хуваагаад, элдүүрээр элдэж хавтгайлна.
3. Элдсэн гурилан дээрээ татсан мах, сонгино хольж, амталсныгаа тавин чимхэнэ. Чимхэхдээ ихэнхдээ дугуй хэлбэртэй болгох бөгөөд цэцгэн бууз, хонин бууз гэх мэт чимхэлт бий.
4. Жигнүүртээ ус хийн буцалмагц дээр нь буузаа тавьж 15-20 минут жигнэнэ.